Ginkumpirmar sang Negros Occidental Police Provincial Office nga high value target sa regional level ang napatay nga si Leoner Jalandoon sang Sitio Sibucao, Barangay Banago, Bacolod City apang temporaryo nga nagpuyo sa Barangay 6, Victorias City.
Suno kay NOPPO director Police Colonel Romeo Baleros, naga-supply sang illegal drugs sa Negros Occidental kag Panay Island si Jalandoon.
Ini ang base sa panu-aron sang mga nadakpan nga drug personalities sa Panay kag Negros.
Sang nagtambong si Presidente Rodrigo Duterte sa political rally sa Bacolod City suno kay Baleros, namensyonar niya ang pangalan ni Jalandoon nga dako ini nga drug personality.
Bangud sini, nagtingob ang pwersa sang Regional Drug Enforcement Unit sang Police Regional Office 6, NOPPO, Central Intelligence Unit sang Bacolod City Police Office kag Victorias City Police Station agud matultulan ang ginapanaguan ni Jalandoon kag matigayon ang operasyon.
Suno kay Baleros, ginarespeto nila ang tawhanon nga kinamatarong apang indi nila marisgo ang kabuhi sang pulis kun mabutang ini sa alang-alang, ilabi na nga armed and dangerous ang subject.
