Ginpostpone sang National Grid Corporation of the Philippines (NGCP) ang scheduled power interruption sa Setyembre 1.
Sa interview sang Bombo Radyo kay Jonathan Cabrera, spokesperson sang Negros Electric and Power (NEPC), naghingyo sila sa NGCP nga ipostpone na lamang ang nakaschedule nga pagshut down sang Bacolod-Alijis 69kV Transmission Line sa Setyembre 1 bangod nga pila man ka adlaw nga naapektohan ang mga consumers sang pagkadula sang kuryente.
Apang, gin-athag sini nga madayon ang scheduled power interruption sang NGCP sa Bacolod-Reclamation 69kV Transmission Line sa Sabado, Agosto 31, alas- 6:00 sang aga tubtob alas- 6:00 sang gab-i.
Sa karun wala pa sang schedule kun san-o patigayunon ang relay setting sang Bacolod-Alijis 69kV Transmission Line.
Nagpasalig naman ini nga kun may schedule na, magahatag man sang pahibalo sa ila ang NGCP kag sila ang maga-inform man sa publiko.
Samtang, iga-energized na ang 18 million MegaVolt Amperes nga power transformer sa Setyembre 1.
Suno kay Jonathan Cabrera, spokesperson sang NEPC, una nga nakaschedule nga ma-energized ini sa Setyembre 2 ukon 3 apang ini ang madasig nga na-install.
Matapos nga ma-energized, ang mga feeders sang Alijis substation nga naka-tie up sa iban nga substations ang iconnect na sa bag-o nga power transformer.
Samtang, gin-athag sini nga kun ienergized na ang 18 MVA, may yara gid sang matabo nga power interruption.
