Patay ang negosyante nga lalaki matapos nga gintiro samtang nagamaneho sang salakyan sa Magsaysay Street, Barangay Singcang Airport, siyudad sang Bacolod, alas-11:00 kagab-i.
Dead on the spot ang biktima nga si Ivan Magbanua sang amo man nga barangay sa gin-agom sini nga tiro sa ulo kag dughan.
Sa interview sang Bombo Radyo kay alyas Boy, witness sa natabo nga insidente, iya nabatian ang apat ka lupok sang ginpatihan nga caliber .45 pistol apang wala niya ini ginsapak bangod nga may yara man sang naglupok nga trayangulo sa unhan.
Suno diri, nabungguan sang Mitsubishi Mirage nga ginamaneho ni Magbanua ang auto sa atubang sini nga ginapanag-iyahan sang mag-asawa.
Gilayon nga nanaog sa auto ang asawa nga babayi kag gintsekyar ang driver sang Mitsubishi apang naurungan na lang ini sang nakita ang biktima nga duguon na.
Suno kay Boy, iya ginhambalan niya ang mag-asawa nga indi pagtandugon ang biktima.
Iya man ginpahayag nga nakita sini ang apat ka mga persona nga nagaangkasanay sa duha ka motorsiklo kag tuman kadasig ang dalagan sang motorsiklo sang ini ang nalagyo nagikan sa crime scene.
Samtang suno sa iloy sang biktima, may yara sang nabaton nga mga death threat ang bata sini kag gina-alegar nga nagka-conflict ini sa isa ka tawo sa Purok Sigay, Barangay 2, siyudad sang Bacolod.
