Ginapakamaayo sang Negrense fashion designer sa Florida, USA nga wala sang Filipino nga nasamaran sa paglaslas sang Hurricane Milton.
Sa interview sang Bombo Radyo Bacolod kay Kirsten Regalado, Bombo International Correspondent derekta sa Miami, Florida, ang derekta nga naigo sang bagyo amo ang Siesta Key City, kag ginapakamaayo na lamang sang mga ini nga wala derekta nga nahalitan ang Tampa City.
Paathag sini nga ang Tampa Bay ang pinakaginakahangaw-an bangod kun may storm surge, apang epekto ang ginalantaw nga mapaanggid sa natabo sadto sa Tacloban sa tion sang Bagyo Yolanda.
Apang aminado ini nga malapad ang kahalitan sang Hurricane Milton kag ini ang may masobra 100 nga dala nga buhawi. Ginapakamaayo naman ni Regalado nga temprano pa naghatag sang abiso si Florida Governor Ron DeSantis kun ano ang dapat ipreparar sa kaangay nga pagtupa sang Hurricane.
Gani antes paman makasulod ang Hurricane Milton, sila ang nakapreparar na sang supplies gani ini ang indi na kinahanglan nga maggwa sa ila nga balay sa paglaslas sang bagyo.
Gilayon man sini nga gincontact ang mga Filipino sa Florida partikular na ang mga tigulang nga nagapuyo sa mga coastal areas.
Ginapakamaayo sini nga sila ang wala sang may nabatun nga report nga may nahalitan nga Filipino, magluwas lamang sa mga minor damages sa ila propedad.
Apang madamo sang wala gihapon sang kuryente kag tubig kasunod sang paglupok sang main pipe sa County gani kontaminado ang tubig.
Ini man ang rasun kun ngaa ginapapreparar sang makaon kag tubig ang mga residente antes paman ang pagsulod sang bagyo.
Madasig naman ang clearing operations bangod sa modern mechanical equipments kasubong man sa bulig sang iban nga mga Estado.
