Ginpasalig sang nurse sa Florida, USA nga maayo ang kahimtangan nila nga mga Pilipino kasunod sang paglaslas sang Hurricane Milton apang nagapangayo sang pangamuyo para sa ila nga recovery.
Sa interview sang Bombo Radyo Bacolod kay Maricar Mijares, Bombo International News Correspondent derekta sa Tampa City, Florida, apisar nga naglandfall sa ila ang bagyo aminado ini nga mas mahinay ang Hurricane Milton kun ipaanggid sa Hurricane Ian nga nag-igo sa ciudad sang Setyembre 2022.
Apang dako nga porsyento sang estado ang nadulaan sang power supply tuga sang mga pagbaha kag pagluntad sang mga buhawi.
Sa pihak sini napabilin naman ang operasyon sang ospital kag sila ang gintunga sa duha ka grupo.
Paathag ni Mijares nga Hulyo pa lamang, bangod ginalauman na ang pagsulod sang Hurricane season sila may nakaplastar na nga groupings nga ma-implementar sa tion sang pagluntad sang bagyo.
Suno kay Mijares, sila ang may sleeping quarter man kag nagadala na lamang sang sleeping mattress agud matulugan ilabi na sa mga malayo ang balay sa ospital.
Bangod sa lapnagon nga brownout, wala man naga-operar ang kadam-an sa mga traffic lights nga nagtuga sang pila ka aksidente.
Suno diri, kadam-an sa mga napatay ang bangod sa pag-igo sang masobra isa ka gatos nga buhawi kun sa diin may-ara pa sang stadium nga ginlupad.
Apang madamo man sang napatay bangod sa pagbunggu-anay sang mga salakyan.
Naghubas naman ang pila ka mga gasolinahan bangod madamo sang mga residente ang ginpili nga magbakal sang reserba antes pa ang pagtupa sang Hurricane Milton.
