BACOLOD CITY – Handa na ang Negrense softball team nga tiglawas sang Asia-Pacific region sa ila nga una nga hampang sa Senior League Softball World Series sa Estados Unidos subong nga adlaw.
Alas 5:30 sang kaagahon, oras sa Pilipinas, atubangon sang Negros Occidental Philippines Senior League ang ASOFEM Senior League nagikan sa Maunabo, Puerto Rico nga tiglawas sang Latin American region.
Ang ASOFEM ang isa lamang sa apat ka mga rehiyon nga kaupod sang Asia-Pacific sa Pool A sang World Series.
Kabahin man sang Pool A ang host team nga Delaware District 3; District 18 Senior League nagikan sa Haverstraw, New York City nga tiglawas sang East region; kag Vidalia Girls Softball Senior League nagikan sa Vidalia, Louisiana nga tiglawas sang Southwest region.
Sunod-sunod ang hampang sang Pilipinas subong nga Agosto 2 bangud matapos ang pag-atubang sini sa Puerto Rican team, magasabak naman ini batok sa District 18 Senior League, alas 8:00 subong nga aga.
Kumpiyansa naman ang regional sports coordinator sang Department of Education Negros Island Region nga masarangan sang Philippine team ang ila nga mga kasumpong.
Suno kay Adolf Aguilar, dalagko kag mabakod ang kontra sa World Series apang may yara sang fighting spirit kag determinasyon nga magdaog ang Negrense team kaangay sang ila ginpakita sa Asia Pacific Regional Tournament sa Singapore sang nakaligad nga bulan.
Ang World Series nga ginapatigayon sa Lower Sussex, Delaware ang nagsugod sang Hulyo 31 kag magatakop sa Agosto 6 kun sa diin napulo ka softball teams nagikan sa nagkalain-lain nga rehiyon sa bilog nga kalibutan ang maga-agaway sa kampeonato.
