BACOLOD CITY — Gindayaw sa gihapon sang sports officials kag mga pumuluyo sang Negros Occidental ang Negrense softball team nga nagsabak sa Little League Seniors Division Softball World Series sa Estados Unidos bilang tiglawas sang Asia-Pacific Region.
Ini apisar pa man nga napaslawan ang team nga makuha ang kampeonato sa prestihiyoso nga torneyo sa bilog nga kalibutan.
Alas 2:00 kaina sang kaagahon, nagsabak sa championship match ang Negros Occidental Little League seniors batok sa host team nga Delaware District 3 Little League nga ginlutos sang probinsya sang Biyernes sang kaagahon.
Natapos ang hampang pasado alas 4:00 sang kaagahon sa score nga 4-0, pabor sa Delaware District 3.
Bangud sini, magapauli ang Negrense team dala ang silver medal kag uyat sang probinsya ang 6 wins, 1 loss record.
3rd placer ang British Columbia District 7 Little League nagikan sa Victoria, British Columbia nga tiglawas sang Canada Region; kag 4th placer naman ang Washington County Little League nagikan sa Bristol, Virginia, USA nga tiglawas sang Southeast region.
Una na nga ginpahayag sang Philippine team nga handom sang mga ini nga makasulod sa bisan ano nga lugar sa apat ka mga pwesto sa World Series.
Sa Facebook account ni Coach Lizviminda Jalandoni sang Negros Occidental Little League majors, ginpahayag sini nga indi ini malain para sa mga first timers nga naghimo sang kasaysayan para sa Negros Occidental sa patag sang world senior softball.
Ini ang ginkumpormehan man ni Provincial Sports Coordinator Nonong Verdeflor nga nagpahayag nga ‘job well done’ ang nadangatan sang softball team nga naghatag sang pangalan sa Negros Occidental.
Nahibaluan nga ini ang labing una nga kahigayunan nga nakakuha sang pwesto ang Negros Occidental sa World Series.
Ang World Series ang nagsugod sang Hulyo 31 kag nagtakop na subong nga kaagahon sa Bruce Layton Field sa Lower Sussex, Delaware.
