Nagalibot ang gobernador sang Negros Occidental sa mga banwa kag ciudad nga nahalitan sang ashfall gikan sa paglupok sang Bulkan Kanlaon.
Sa interview sang Bombo Radyo Bacolod kay Negros Occidental Governor Eugenio Jose “Bong” Lacson, kaina sang aga siya ang nagbisita sa evacuation centers sang banwa sang La Castellana.
Suno diri ang La Castellana ang may pinakamadamo nga apektado, samtang may pipila man ka Barangay nga naapetuhan sa La Carlota City, Candoni kag sa iya mismo hometown sa ciudad sang San Carlos.
Aminado ang gobernador nga tubig gid ang labi nga ginakinahanglan sang mga evacuees ilabi na nga indi masaligan ang mga fresh water sources.
Gani kun luyag nga magbulig isa sa maayo nga ikonsiderar ang paghatag sang bottled water.
Ginpasalamatan man sini ang Department of Social Welfare and Development (DSWD) sa pagpanguna ni Secretary Rex Gatchalian kag sa mandato ni President Ferdinand “Bongbong” Marcos Jr. sa paghatag sang family food packs.
Sa ihibalo sini, may 20 mil pa nga food boxes ang natalana nga ipadala sang national government, kag ginabyahe na ang inisyal nga 10 mil.
Nagtawag man sa iya si Defense Secretary Gilbert Teodoro, agud seguruhon kun nakapakig-angot na ang Office of the Civil Defense (OCD) Region 6.
Nagpadala man sang mga bulong ang Provincial Health Office sa mga evacuation centers, gani ginapanugyan sang gobernador nga mas bentaha sa mga pumuluyo kun sila ang mag-evacuate.
Panugyan ni Lacson nga padayun lamang nga ipangamuyo nga magkanay na ang aktibidad sang bulkan kag indi na liwat mag-alburuto.
Ginapakamaayo man ni Lacson ang mas madasig nga hulag sang Disaster Risk Reduction and Management Offices, nga ginalauman sini nga mapabilin sa iban pa nga mga kalamidad nga mahimo pangatubangon sang probinsya.
