Ginpasiguro sang gobernador sang Negros Occidental nga may yara sang bastante nga suplay sang pagkaon, bulong, kag iban pa nga mga kinahanglanon kun ipatuman na ang enhanced community quarantine sa bilog nga probinsya.
Madumduman nga kahapon, naistoryahan sa ginpatigayon nga pagsinapol upod ang mga local chief executives ang pag-deklarar sang 14-day enhanced community quarantine bilang kabahin sang tikang sang probinsya agud matapna ang paglapta sang coronavirus disease 2019 (COVID-19).
Gin-athag ni Lacson nga ang ECQ ang wala nagabuot-silingon nga indi na gid makagwa sa balay ang mga tawo.
Suno sa iya, mahimo sa gihapon nga makagwa ang isa ka miyembro sang kada pamilya agud magbakal sang mga kinahanglanon kaangay sang pagkaon kag bulong.
Dapat nga mag-issue man sang quarantine pass ang barangay sa kada panimalay.
Dugang pa sini, magapadayon man ang sugar industry sa pag-galing agud may yara sa gihapon sang palangabuhian ang mga Negrense.
Samtang, ila pa ginatun-an ang pag-untat biyahe kun mapatuman na ang ECQ.
Nagpangako man ang gobernador nga magahatag ang provincial government sang P1 million worth sang rice assistance sa tanan nga ciudad kag banwa sa probinsya.
Samtang, nahisugtan naman ang uniform curfew nga ipatuman sa bilog nga probinsya nga magasugod alas-10:00 sa gab-i tubtob alas-4:00 sa kaagahon pagkasunod nga adlaw.
Ginatugyan naman sini ang desisyon sa kada local government unit (LGU) angot sa curfew para sa senior citizens kag sa mga minors.
Liwat naman ini nga nagpahanumdom nga wala sang rason agud mag-panic.
Suno sa iya, ang ECQ ang ipatuman lamang agud malimitahan ang hulag sang tawo kag malikawan ang paglapta sang balatian.
