Nakahanda na ang Negros Occidental Provincial Government sa pagpanguna ni Negros Occidental Governor Eugenio Jose “Bong” Lacson kag Vice Governor Joeben Alonso nga magpadala sang collapsed structure search and rescue team agud nga magbulig sa mga naapektuhan sang linog sa Mindanao kahapon, Hunyo 8.
Sa interview sang Bombo Radyo Bacolod kay Irene Belle Ploteña, Head, Negros Occidental Provincial Disaster Risk Reduction Management Office, nagtawag sa ila ang Office of the Civil Defense kag ginhibalo kun makapadala sila sang team sa Sarangani Province nga isa sa mga naapektuhan sang linog kahapon para sa nagakaigo nga assistance.
Suno kay Ploteña may yara na sang nakahanda nga team kag nagahulat lamang sila sang GO signal sang OCD.
Samtang ang provincial government sang Negros Occidental ang nagapreparar naman kun hinali may magluntad nga linog sa probinsya.
Ini bangud nga padayon nga ginabantayan ang paghulag sang mga fault lines nga nasakupan sang Negros Trench nga ginabug-usan sang Pinocawan River Fault nga makita sa Negros Oriental tubtob sa San Carlos City, Calatrava-Toboso Fault; West Negros Fault; Central Negros Fault kag Candoni Fault.
Panugyan sini nga sa tion nga magluntad ang linog nga ipabilin nga kalmado kag indi pagkalimtan ang dock, cover and hold kag magpadulong sa safe nga lugar.
Ang provincial government sang Negros Occidental ang nagapatigayon man sang earthquake drills agud nga masiguro nga ang mga government employees kag bisan pa sa private sector employees ang nakahibalo kun ano ang himuon sa tion sang linog.
