May-ara na sang kumpirmado nga kaso sang Pertussis ukon Whooping cough sa probinsya sang Negros Occidental, samtang padayun naman ang monitoring sa mga suspected cases sa ciudad sang Bacolod.
Ang nagpositibo sa pertussis sa probinsya ang nahibaluan nga isa ka duha ka bulan nga lapsag nga babayi.
Ini ang ginkumpirmar mismo ni Negros Occidental Governor Eugenio Jose “Bong” Lacson, samtang ginapasalig naman sini nga maayo na ang medical condition sang pasyente kag ini ang nakagwa na sa ospital.
Pahayag sang gobernador nga may anom pa ka nabilin nga suspected cases nga napadala na ang specimen sample sa Research Institute for Tropical Medicine (RITM).
Sa pihak nga bahin, padayun naman ang monitoring sang suspected cases sang Pertussis sa ciudad sang Bacolod.
Sa interview sang Bombo Radyo Bacolod kay Councilor Claudio Jesus “Kalaw” Puentevella, chairperson sa Committee on Health and Sanitation sa Sangguniang Panlungsod, ginapangabay gid sini nga wala sang mangin positibo sa mga suspected cases.
Paathag sini nga sila ang nagahulat na lamang sang confirmatory result gikan sa mga ginpadala nga specimen samples.
Pasalig man sang konsehal nga sila ang nagapangaman, kag nagpanugyan sa publiko nga indi magpanic bisan magpositibo pa ang resulta.
Panawagan ni Puentevella sa tagsa ka Bacolodnon nga maghalong kag seguruhon nga mapabakunahan ang mga kabataan bangod sila ang vulnerable sa balatian.
Panugyan sini nga magkooperar sa tagsa ka Barangay Health Workers bangod sila ang nagapatigayon sa karun sang mapping sa mga wala pa sang complete vaccination status.
