Nagdeklarar na sang state of calamity ang provincial government sang Negros Occidental bangod sa halit nga tuga sang bagyo Tino sa probinsya.
Sa interview sang Bombo Radyo kay Negros Occidental Governor Eugenio Jose ‘Bong’ Lacson, halos bilog nga probinsya nahalitan sang bagyo kag ini na ang ikaduha nga pagdeklarar sang state of calamity sa probinsya subong pa lamang nga tuig.
Suno diri, bisan ang presidente gin-aprubahan na ang deklarasyon sang “state of national calamity”.
Ginapasalamatan sang gobernador si President Ferdinand Marcos Jr. bangod makapila ka beses na nga nakabaton ang probinsya sang ayuda halin sa opisina sini.
Ang Negros Occidental nalakip sa makabaton sang P50 million nga ipanagtag sa kada probinsya nga nahalitan sang bagyo Tino.
Sa karun, ginalauman ni Lacson nga mapabalik na ang kuryente kag communication lines agud ma-assess kun pila ang halit sa agrikultura kag iban pa.
Iya man ginalauman nga makita na ang mga namissing kag nagpasalig nga indi sila mag-untat sa pagpatigayon sang search and retrieval operation tubtob nga makit-an ang mga ini.
