Magapadayun gihapon ang pagpatigayon sang Provincial Meet sa Negros Occidental apisar sang mataas nga heat index.
Ang opening ceremony ang ginpatigayon pasado alas-4:00 ang takna subong nga hapon kun sa diin sila ang may parada padulong sa Panaad Park and Stadium.
13 ka mga division area ang magasambuwa kun sa diin nagadangat sa 6,500 ang magapartisipar nga atleta.
Ang Negros Occidental Provincial Meet 2024 ang nakaschedule halin Abril 1 tubtob 6, kun sa diin ang mga magadaog ang mangin representative naman para sa Western Visayas Regional Athletic Association (WVRAA) 2024 kun sa diin Negros Occidental man ang host.
Sa interview sang Bombo Radyo Bacolod kay Romeo Sison, Negros Occidental Provincial Sports Coordinator, bangod sa mataas nga heat index, nadesisyonan nga isdugon ang oras sang pagpatigayon sang mga outdoor events.
Suno diri, wala sang patigayunon nga mga outdoor events halin alas-10:00 sa aga tubtob alas-2:00 sa hapon.
Magluwas sa opening ceremony, sa Panaad Park and Stadium man patigayunon ang athletics event.
Sa nagkalainlain naman nga eskwelahan sa Bacolod City patigayunon ang mga indoor events samtang may mga sports events man nga patigayunon sa nagkalainlain nga mga banwa kag ciudad kaangay sa Silay kag Talisay City kasubong man sa Murcia kun sa diin patigayunon ang boxing.
Suno kay Sison, may 15 ka mga sporting events sa Elementary level samtang 22 naman ang sporting events sa Secondary level.
Magluwas sa regular sporting events, may-ara man sang Para Sports para sa mga persons with disability (PWD).
Nagapanguna naman nga ginaseguro sa mga belittling areas ang ventilation, tululugan, CR kasubong man ang supply sang tubig.
