Nagbisita si Senator Christopher Lawrence “Bong” Go sa ground breaking ceremony sang Super Health Center nga gintukod sa ciudad sang Himamaylan.
Sa interview sang Bombo Radyo Bacolod sa Senador, sa medium-type polyclinic sarang makapabata, dental, laboratory, X-ray kag mga primary care service sang universal healthcare kag yara naman diri ang Konsulta sang Philippine Health Insurance Corp. (PhilHealth).
Sa pagduso sang mga kongresista nga gin-ugyunan man nila nga mga Senador, magatukod sang 31 ka Super Health Centers sa Negros Occidental.
Paathag ni Senator Bong Go nga sa Negros Occidental ang may pinakamadamo nga tukuron, bangod 600 ka pasilidad lamang ang ipatindog sa bug-os nga Pilipinas.
Ang Senador ang nagalibot sa karun sa Western Visayas kun sa diin una ini nga naggikan sa Iloilo antes nagpadulong sa Himamaylan, kag iya man nga padulongan ang Super Health Center nga ginatukod sa Bacolod City kag Victorias City.
Sa pihak nga bahin, ginpangagda naman sini ang pag-avail sa serbisyo sang Malasakit Center.
Suno sa Senador, ang one-stop shop ang yara na sa mga ospital kun sa diin nalakip na diri ang apat ka government agencies kaangay sa PhilHealth, Department of Health (DOH), Department of Social Welfare and Development (DSWD) kag Philippine Charity Sweepstakes Office (PCSO).
Sa kabug-usan, may-ara na sang 161 ka Malasakit centers nationwide kalakip na sa Corazon Locsin Montelibano Memorial Regional Hospital (CLMMRH).
Paathag sang Senador nga basta Pilipino, qualified sa Malasakit Center.
