Nanindugan ang Chief Executive Officer sang Metro Bacolod Chamber of Industry (MBCCI) nga dako nga economic benefits ang matuga sang pagtukod sang Negros Island Region (NIR).
Ini kasunod sang panawagan ni Rev Fr. Julito Cortes, Bishop sa Diocese of Dumaguete, nga i-veto ni President Ferdinand “Bongbong” Marcos Jr. ang NIR Bill sa panindugan nga ini ang kulang sa paathag.
Panindugan sini nga ang request ang para maprotektahan ang Negros Oriental.
Pahayag sini nga kinahanglan anay magpatigayon sang information campaign kag public forums agud mahangpan sang tanan nga sektor ang epekto sang pagtukod sang NIR.
Sa interview sang Bombo Radyo Bacolod kay Frank Carbon, sang ginpagwa sadto ni late President Benigno “Noynoy” Aquino III ang NIR, nagtukod man sang Negros Island Development Council.
Ang mga ini ang nagpatigayon sang kapin pito ka mga Major Infrastructure Projects kag isa sa nagapanguna nga benepisyaryo amo ang Negros Oriental.
Suno diri, ang congested port sadto sa sentro sang Dumaguete City ang ginsaylo, kasubong man ang airport.
Ini ang gintun-an man sang Civil Aviation Authority of the Philippines (CAAP), kag ini ang gintukuran na sang circumferential roads.
Apang mapa-untat ang NIR sa administrasyon ni former President Rodrigo Duterte, wala naman napadayun ang mga proyekto.
Kun mapadayun suno kay Carbon, ang lugar ang mangin kaangay man sa dalan padulong sa Bacolod-Talisay Airport, nga matawhay kag wala na sang congestion.
Samtang, kalakip man sa mga major infrastructure projects ang mga Farm-to-Market roads nga nagakonekta sa Negros Occidental kag Negros Oriental, nga subong ginagamit na.
Pinaagi sa pag-isa sang Negros Occidental kag Oriental, maconsolidate ang mga magagmay nga resources kag makapatigayon sang dalagkuan nga proyekto.
Ini ang maka-engganyo naman sang mga investors, kag makahatag sang dugang nga trabaho.
Ginalantaw ni Carbon nga mas magasanyog pagid ang economic activities sa Negros Island Region partikular na kun mastabilize na ang power supply.
Sa pihak nga bahin, ang Siquijor naman ang magaserbe nga kaangay sa Boracay sang Panay, ilabi na nga madamo sang mga beach sa lugar nga indi pa exploited.
