Preparado na ang Negros Electric and Power Corporation (NEPC) sa mahimo nga epekto sang Bagyo BASYANG sa pagsupply sang kuryente.
Sa interview sang Bombo Radyo Bacolod kay Engr Leomel Tambanillo, Assistant Vice President for Planning and Business Operation sang Negros Power, duha ka adlaw ang nakaligad, sila ang nagpatigayon na sang survey kag clearing operations sa mga area nga may nakapalibot nga kahoy.
On stanby na ang tanan nila nga personnel matapos ginpasaka sa Blue Alert status ang Negros Power kaina sang aga.
Kadungan sini, gin-activate naman ang command center kag satellite warehouse sa Bago City, Silay City, Talisay City kag Murcia kun sa diin nakapreparar na ang mga logistics materials nga kinahanglan kun may ara sang respondihan.
Suno diri, may mga ginplastar man nga area coordinators nga ginalakipan sang 4 sa Bacolod City, 2 sa Talisay City, 2 sa Silay City, 4 sa Murcia, 2 sa Bago City kag 4 sa Salvador Benedicto.
May 59 ka personnel man nga on standby sa command center.
Aminado si Tambanillo nga madamo kun kis-a sang nagareklamo nga indi makacontact sa ila nga hotline ilabi na kun malapad ang coverage sang power interruption.
Suno diri, 11 lamang ang ila nga linya, gani indi tanan ang masabat kun dululungan nga nagatawag.
Panawagan ni Tambanillo nga kun indi makasulod paagi sa pagtawag, mag mensahe na lamang sa facebook page sang Negros Power.
Yari ang mga hotline numbers sang Negros Power: 034 475 6372 para sa landline.
Sa cellphone numbers: 0998-845-9460/0917-159-7028 sa Bacolod City; 0962-705-8632 sa Bago City; 0933-876-3283/0995-539-1742 sa Silay City; 0908-812-3800 sa Talisay City; kag 0919-377-1558 sa Murcia kag Salvador Benedicto.
