Luyag sang anay gobernador sang Negros Occidental nga ma-adoptar ang pagtawag sang Negros Island Region sa ‘Negros Siquijor Administrative Region’.
Sa interview sang Bombo Radyo Bacolod kay Former Negros Occidental Governor Rafael ‘Lito’ Coscolluela, ginapasalamatan sini nga ginpasar bilang layi ang Republic Act 12000 ukon Negros Island Region Act bangod ini na ini basta-basta nga maligwat.
Apang ginakatingala sini kun ngaa wala gid ginlakip sa ngalan sang rehiyon ang probinsya sang Siquijor, nga daw kaangay nga ini ang aksidente lamang nga naulamid.
Bangod indi mahapos nga islan ang ngalan sang napasar na nga layi, kag ini ang magakinahanglan pa sang panibag-o nga legislation, gani ginapanawagan na lamang ni Coscolluela nga mahimuan sang formal resolution ang pagtawag sa rehiyon bilang ‘Negros Siquijor Administrative Region’, agud nga ini ang mas marehistro sa pinsar sang publiko.
Dugang pa sini nga sa tanan nga mga panibag-o nga developments sa rehiyon, dapat nga malakip na ang ngalan sang Siquijor, agud indi ma-insulto ang probinsya.
Suno diri, sa karun ginahulat pa ang Implementing Rules and Regulations (IRR) agud maplastar ang masunod nga tikang.
Apang antes sini dapat magtipon na ang Interim Regional Development Council agud madiskusyunan ang distribusyon sang Regional Offices.
Sang nakaligad, kun ang Regional Office ang yara sa Bacolod City, may-ara sang ginatukod nga sub-office sa Dumaguete, kag ang mga personnel ang may schedule naman kun ano nga adlaw sa tagsa ka opisina.
Samtang dapat man nga ireview ang Regional Development Plan sang nakaligad nga NIR bangod nagbag-o na ang mga priorities kaangay sang kuryente, tubig, pagkaon kag economic security kag dapat man nga kuhaon ang data gikan sa Siquijor.
