Ginpahayag sang anay konsehal kag abogado nga madamo sang mahimo makaso sa FM radio news anchor nga nagbuya sang ‘rape joke’ sa iya nga reporter samtang nakalive broadcast sa social media.
Madumduman nga madasig nga naka-agaw sang atensyon sa social media kag pagkondenar gikan sa mga media organizations kag iban pa nga grupo ang paglahog sang news anchor nga ‘i-rape’ sini ang reporter agud nga siya ang mapriso kag masugilanon ang amay nga nagmaltratar sa iya bata nga babayi nga subject sang ila diskusyon.
Makapila pa sini ginsulit ang pamangkot nga kaangay nga nagapilit sa reporter nga magsabat kun magasugot ukon indi sa iya suhestyon, nga nagserbe nga insulto sa lady reporter.
Sa interview sang Bombo Radyo Bacolod kay Atty Renecito Novero, ang kaso ang sulod sa Republic Act 11313 ukon Safe Space Act.
Ang layi ang nagapadalum pa sa Republic Act 7877 ukon Anti-Sexual Harassment Act of 1995.
Nalakip diri ang sexual harassment paagi sa physical, verbal communication, kag online.
Sa nasambit nga isyu, nagapati si Novero nga masulod ang kaso sa parehas nga verbal communication kag online nga aspeto ilabi na nga ginhimo ang rape joke samtang nakalive-broadcast.
Dugang pa sini nga sa Safe Space Act, wala nagamatter ang edad, gender kag position sa kaso.
Bangod sa seryoso nga kaso, nagapati si Novero nga magadangat sa P500,000 ang monetary penalty kag magadangat sa ‘prison correctional’ ukon tubtob anom ka tuig nga pagkapriso.
One point higher naman ang kaso kun ang biktima ang menor de edad, senior citizen ukon person’s with disability ukon ‘prison mayor’, nga may jail time nga 6 years and 1 day tubtob 12 years.
Apang paathag ni Novero nga ang Safe Space Act ang special law, gani indi ma-apply ang double jeopardy.
Ini ang nagakahulugan nga luwas sa kaso angot sa bayolasyon sa Safe Space Act, siya ang sarang man nga makasuhan sa iban pa nga bayolasyon sa idalom sang revised penal code.
Kalakip diri ang RA10571 ukon Anti-Cybercrime Law kag RA7877 ukon Anti-Sexual Harassment Act of 1995.
