Nagpaathag ang National Grid Corporation of the Philippines (NGCP) Visayas sa rasun sa pag-issue sang Red kag Yellow alert.
Sa interview sang Bombo Radyo Bacolod kay Michelle Visera, Regional Corporate Communication Officer sa NGCP Visayas, bilang system operator responsibilidad nila ang pagtsekyar sa power supply kasubong man sa demand.
Suno diri, sila ang naga-issue sang Yellow Alert status kun manipis ang reserba nga kuryente, kaangay sa sitwasyon sa karun sa Luzon kag Visayas nga nag-umpisa sang Abril 16.
Samtang Red Alert Status naman hinali nga wala nagid sang reserba nga power supply.
Ini ang nagakahulugan nga inkaso nga may power plant nga hinali madula sa ila system ukon may matabo nga outage, may posibilidad nga magpatigayon sang manual load dropping bangod wala sang reserba nga sarang ma-augment.
Pasalig ni Visera nga sila ang transparent gani adlaw-adlaw nga naga-issue sang advisory, agud indi magulpihan ang mga pumuluyo.
Suno diri, sang Abril 12 nagsangat sa 13 ang mga forced outages sang mga planta samtang 13 naman sang Miyerkules, kag may kahigayunan pa nga nagdangat sa 15 ang forced outages sa bahin pa lamang sang Visayas.
Ginapakamaayo na lamang sang mga ini nga naga-operar na ang Mindanao Visayas Interconnection project, nga nakabulig sa pagdugang sang power supply.
Sa pihak sang mga announcement sang Red kag Yellow Alert, gin-athag ni Visera nga sila ang wala pa sang may napatigayon nga manual load dropping bangod masustiner paman ang supply.
Panawagan sini sa mga konsumedor nga magbulig pinaagi sa pagkinot sang power consumption.
Apang ginapasalig naman ni Visera nga ginatinguhaan man sang mga planta sang kuryente nga gilayon nga makabalik sa grid matapos ang force outages.
Sa pihak nga bahin, ginpaalinton man sini nga sila ang magapatigayon sang scheduled maintenance activity bwas (Abril 21) sa Bacolod-Silay 69kV transmission line halin alas-6:00 sa aga tubtob alas-6:00 sa gab-i.
Ini ang maga-apekto sa Talisay, Panaogao kag Lopez substations.
