Nagpangayo sang pag-intindi ang Communications and Public Affairs Office sang National Grid Corporation of the Philippines (NGCP) – Western Visayas sa pagkadula sang kuryente sa pagpatigayon nila sang maintenance activity.
Sa interview sang Bombo Radyo Bacolod kay Michelle Visera, nagdungan na lang ang Negros Electric and Power Corporation (NEPC) sang ila rehabilitation efforts sa pagpatigayon sang maintenance activity sang NGCP.
Suno diri, kahapon alas- 8:00 sang aga tubtob alas- 5:00 sang hapon may yara sang power interruption sa sakop sang Bacolod-Alijis 69KV line apang ala- 1:00 pa lamang sang hapon natapos na sang NGCP ang ila trabaho.
Suno kay Visera, nagpatigayon sang maintenance activity ang NGCP bangod naexpose na sa init kag ulan ang ila transfomer kag suno pa diri, mas maayo nga ginpatimprano ang trabaho sang sa hulaton pa nga magkaproblema nga makahalit sa mga consumers sa mas madugay pa gid nga tion.
Pahayag ni Visera, nagatinguha ang NGCP nga mahatag ang supply sang kuryente nga tayoyon apang gin-athag sini nga ang preventive maintenance indi 100 percent nga wala na sang problema apang ini makapahagan-hagan sa halit nga resulta sang power interruptions.
