BACOLOD CITY — Pagasuguran na sa Lunes, Abril 3, ang pagpatuman sang No Jaywalking Ordinance sang ciudad sang Bacolod ukon pagdakop sa mga nagatabok sa dalan nga wala nagaagi sa pedestrian lane.
Suno kay Police Supt. Luisito Acebuche, hepe sang Bacolod Traffic Authority Office, ang City Ordinance 338 ang ipatuman sumugod las 10:00 sa aga sa downtown area, sa atubang sang Robinson’s Mall sa Mandalagan kag sa dalan Araneta.
Kahapon, Biyernes, nagpatigayon sang dry-run ang BTAO agud nga maanad na ang mga pumuluyo samtang ginbutangan naman sang baral ang iban nga parte sang downtown area agud nga matabok ang mga tawo sa pedestrian lane mismo.
Sa tion nga ipatuman na ang ordinansa, ang mga violators ang magabayad sang 100 pesos nga multa sa 1st offense; 200 pesos sa 2nd offense; kag 300 pesos sa 3rd offense kag kaso nga paglapas sa City Ordinance 338.
Ang mga wala naman sang inugbayad ang magahatag sang community service sa sulod sang isa ka adlaw.
