Preparado na ang Negros Occidental High School (NOHS) sa pagbukas sang klase sa Lunes.
Sa interview sang Bombo Radyo Bacolod kay Dr Cheryl Tondo, principal IV sang NOHS, nangin madinalag-on ang ila nga ginpatigayon nga Brigada Eskwela.
Ginpasalamatan man sini ang mga stakeholders, nanarisari nga Barangay, kag mga non-governmental organization (NGOs) nga nagbulig sa Bayanihan sa Paaralan.
Ginpakamaayo sini nga gintempranuhan nila ang enrollment sang Mayo 18, gani antes ang Mayo 28 sila ang may numero na sang absorptive capacity sang mga kabataan.
Suno kay Tondo, 1,300 kada grade level ang ila gincater, apang sa karun ginpasaka nila ang capacity sa 1,500 per grade level.
Aminado ini nga madamo sang luyag nga maka-eskwela sa NOHS, apang indi nila masarangan nga batunon ang tanan bangod sa kakulang sang classroom kag manunudlo.
Agud makacater sang mas madamo nga senior high school students, ginhimo nila nga shifting ang klase, kun sa diin Grade 11 sa aga samtang Grade 12 naman sa hapon.
May ara man sang night classes nga alas-3:00 sang hapon tubtob alas-8:00 sang gab-i.
Suno kay Tondo, ang Hunyo 8 tubtob 11 ang ginakabig nga starting block ukon preparasyon para sa actual instructional teaching, gani ini ang indi madala sa pag-isip sang school days.
Ini ang ginhimo ilabi na nga ipatuman naman ang 3 terms sa School Year 2026-2027.Samtang… nag-offer sang libre nga haircut kag nagbulig sa Brigada Eskwela sang Negros Occidental High School (NOHS) ang mga katapo sang militar.
Sa interview sang Bombo Radyo Bacolod kay Captain John Mallorca sang 2nd Civil-Military Operations Company (2CMOC) sa idalom sang 3rd Civil-Military Operations Battalion, ini ang kabahin sang ila civil military initiatives.
Kun sa diin sila ang nagabulig sa pagpanglimpyo, pagpaminta, kag iban pa nga sarang mabulig sa pagpatigayon sang Brigada Eskwela sa nagkalainlain nga eskwelahan sa Negros Occidental.
Sila ang naghatag man sang libre nga haircut sa mga estudyante.
Ini ang nagapakita nga indi lamang combat operation ang ginahimo sang militar, kundi sila ang madamo pa sang kontribusyon sa komunidad.
