Nagalaom ang deputy spokesperson sang Negros Occidental Police Provincial Office (NOCPPO) nga wala sang may magpositibo sa mga police personnel nga nagtambong sa Anti-Drug Summit nga ginhiwat sang nagligad nga Biyernes kun sa diin isa sa mga partisipante ang nagpositive sa COVID-19.
Sa interview sang Bombo Radyo kay Police Lt. Abegael Donasco, ginpahayag sini nga nagtambong sa nasambit nga summit ang tanan nga chief of police sang 19 ka mga municipalities kag 12 ka mga ciudad sa probinsya lakip na si Provincial Director Police Col. Romeo Palgue.
Suno kay Donasco, sa karun wala pa ini sang impormasyon kun nag-isolate na ang mga COP apang ila pagahimuan sang tikang agud ini ang gilayon nga mahibaluan.
Nagapati man ini nga magapaidalum sa swab test ang mga COP nga nag-attend sa summit bangud masami nga naga-undergo diri ang mga police personnel sa bulig sang ila local government unit.
Sa karun suno sa iya, wala man sang may pulis sa headquarters nga nagasuprer sang sintomas sang COVID-19.
Nag-observe man suno diri sa health protocols ang mga personnel nga nagtambong sa summit.
Nagpahanumdum man si Donasco sa mga pumuluyo nga magsunod sa mga ginapatuman nga protocols kag magkooperar sa gobyerno kag kapulisan.
