NPA, nag-ako nga sila ang may kahimuan sang mga pagpamatay sa nanarisari nga bahin sang Negros Occidental sang Abril tubtob Mayo

Gin-ako sang Leonardo Panaligan Command-Central Negros Guerrilla Front sang New Peope’s Army (NPA) nga sila ang nagpatay sang nagadangat na siyam ka mga persona sa nagkalainlain nga bahin sang Negros Occidental sa sulod sang isa ka bulan.

Ginapanindugan sang rebelde nga grupo nga ila ginsentensyahan sang kamatayon ang mga biktima bangod sila ang nagaserbe nga informant sang militar.

Ang mga biktima ang ginalakipan nanday Danny Boy Bartolome sang Sitio Paho, Camandag, La Castellana, nga ginpatay sang Abril 11; Barangay tanod Alexander Alquizar sang Proper Lagaan, Calatrava sang Abril 20; Myrna Bilando sang Sitio Duga-anon, Barangay Oringao, Kabankalan City, sang Abril 21; Jun Habagat sang Sitio Cagay, Barangay Camindangan, Sipalay City kag Albert “Tongkai” Golez sang Sitio Cuyawyaw, Barangay Inolingan, Moises Padilla nga lunsay ginpatay sang Abril 24; Ritoy Pedro sang Sitio Kamanggahan, Barangay Amontay, Binalbagan sang Abril 28; Barangay tanod Donie Baculi sang Sitio Bactolon, Barangay Camindangan, Sipalay City sang Mayo 3; kag si Armando Binaloac sang Sitio Naube, Barangay. Puso, La Castellana sang Mayo 9 nga isa ka Person with Disability (PWD).

Apang ginpanginwala naman sang makawala nga grupo nga sila ang nagpatay kay Purok chairman Reynaldo “Jimmy” Jacolbe sang Barangay Puso, La Castellana sang Mayo 1.

Sa interview sang Bombo Radyo Bacolod kay Lt. Col. J-Jay Javines, chief sa Public Affairs Office sang 3^rd Infantry Division sang Philippine Army, ginpamatud-an lamang sang NPA nga sila mga terorista.

Ini ang nagapakita naman nga luyag lamang mamahog sang grupo kag ipakita ang ila presensya apisar nga remnants na lamang ang mga ini bangod dismantled na ang tanan nga NPA front sa Negros.

Apang bangod sila ang nagalikaw na sa pagkomprontar sa militar, sila ang nagapangita sang soft target ukon mga sibilyan, agud mahadlok ang mga pumuluyo.

Panindugan sini nga indi matuod nga informant sang militar ang mga biktima, bangod madamo sa mga ini ang indi gani kwalipikado nga mangin informant.

Welcome man sa ila ang patigayunon nga imbestigasyon sang Commission on Human Rights – Bacolod sa ginalantaw human rights violations sang rebelde nga grupo.