Magaimplementar ang city government sang Bacolod sang number coding sa mga Home Quarantine Pass agud nga mas malimitahan pa gid ang mga nagagwa sa ila mga puluy-an.
Ini ang kasunod sang na-obserbahan nila kahapon nga madamo sang mga salakyan ang nagalambiyong sa ciudad apisar pa sang ginapatuman nga enhanced community quarantine.
Kaina sang kaagahon, isa ka executive order ang ginpagwa ni Mayor Evelio Leonardia ang Executive Order No. 30 Series of 2020 nga magasugod bwas nga adlaw sang Miyerkules.
Sa exclusive interview sang Bombo Radyo kay Leonardia, tanan nga mga HQP nga nagatapos sa ODD numbers ukon 1,3,5,7,9 ang mahimo lang makagwa kada M-W-F ukon Lunes, Miyerkules kag Biyernes samtang ang mga HQP naman nga nagatapos sa EVEN numbers ukon 0,2,4,6,8 ang mahimo makagwa sa ila mga puluy-an kada T-TH-S ukon Martes, Huwebes kag Sabado.
Samtang, wala naman sang may makagwa kada Domingo.
Dugang pa sang alkalde nga subong nga adlaw niya ipagwa ang Executive Order nahanungod diri kag ipatuman ini sumugod sa Miyerkules, Abril 15.
Suno kay Leonardia, may yara sang 150 mil ka mga HQP nga ginpanghatag sa kada household sa 61 ka mga barangay sa ciudad gani nga kun magtingob ang mga ini gwa sa ila mga puluy-an, sigurado nga maginutok ang mga ini.
Liwat nga nagpangabay sang kooperasyon sa publiko ang alkalde nahanungod sa bag-o nga polisa.
Suno sa iya, temporaryo lamang ini kag sigurado nga magabalik gid sa normal ang sitwasyon kun magsunod lamang ang tanan sa mga pagsulundan nga ginapatuman agud nga matapna na ang COVID-19.
