BACOLOD CITY — Ginkumpirmar sang Department of Health Region 6 nga nagnubo ang numero sang mga kabataan nga nagpabakuna sa nagkalain-lain nga balatian matapos nagtuhaw ang isyu sa Dengvaxia vaccine.
Sa interview sang Bombo Radyo, ginpahayag ni Dr. Renilyn Reyes, regional coordinator sang immunization program sang DOH Region 6, nga 77 porsyento lang ang coverage sang school-based immunization program sa Western Visayas subong nga tuig.
Ini ang mas manubo sa masobra 90 porsyento sang nagligad nga tuig.
Sakop sang school-based immunization program para sa Grade 1 kag Grade 7 ang measles, mumps and rubella (MMR) vaccine ukon para sa tipdas, bayuok kag makayha.
Para naman sa Grade 4 suno kay Reyes, may yara sang bakuna kontra human papilloma virus ukon HPV.
Ang pagnubo sang nagapabakuna suno sa doktor ang mahimo bangud sa misinformation sang publiko matapos magtuhaw ang kontrobersiya sa Dengvaxia nga ginapatihan gintunaan sang kamatayon sang pila ka mga kabataan.
Nahibaluan nga sa school-based immunization program, kinahanglan ang pahanugot sang ginikanan bangud menor de edad pa ang mga ini.
