Magapatigayon sang paghinun-anon ang Office of the Civil Defense Regional Office 6 subong nga adlaw, Marso 12 agud nga magtipon sang data sang kahalitan sang El Niño sa rehiyon, agud mahibaluan kun kinahanglan nga magdeklarar sang state of calamity.
Sa interview sang Bombo Radyo Bacolod kay Cindy Ferrer, Information Officer sang OCD-6, nagdangat sa P689.9 Million ang kabug-usan nga halit sang El Niño sa bug-os nga Western Visayas, 18,039 ka mga mangunguma ang naapektuhan samtang nagdangat sa 13, 366.39 ka hektariya sang humayan ang apektado.
Suno kay Ferrer, nagapanguna ang Iloilo Province nga may narecord nga kahalitan bangud sa El Niño nga nagdangat sa P486 million, nagapangaduha ang Antique nga may P115 million kag ikatlo ang Negros Occidental nga may P55 million nga kahalitan.
Samtang sa Negros Occidental lamang nagdangat na sa 1,205 ka mga mangunguma ang apektado sang EL Niño.
Suno kay Ferrer, wala man sang nabaton nga report ang Office of the Civil Defense Regional Office 6 sang report nga may nagdangat na sa critical level ang mga dam sa probinsya sang Negros Occidental.
Suno pa diri, una na nga nagreport sang kakulangan sang tubig ang walo ka barangay sa ciudad sang Himamaylan apang nasolusyunan naman sang Local Government Unit matapos nga magpatigayon sang water rationing.
Bangud sa tuman kainit nga panahon nga dala sang El Niño, ginsuspend ang face to face classes sang Elementary kag high school sa ciudad sang Bacolod sang March 11 kag March 12 kasubong man sa pila ka mga local government units sa probinsya sang Negros Occidental kaangay sang Kabankalan City.
