Ginkumpirmar sang provincial election supervisor sang Negros Occidental nga nag-abot na kahapon ang mga balota nga gamiton sa Mayo 12 midterm elections.
Sa interview sang Bombo Radyo Bacolod kay Atty. Ian Lee Ananoria, nag-abot kahapon sang aga ang mga balota sa Bredco port kag gindala sa F2 hub agud nga isegregate kag ini ang ipanagtag sa local treasurers.
Suno kay Ananoria, tsekyaron pa sini kun kompleto na ang para sa Negros Occidental antes sang mga ini ipanagtag sa mga Local Government Units.
Suno diri kun may kulang ipahibaluon sang mga ini ang national government apang dapat kumpleto na ini.
Nagpagwa na ang COMELEC Negros Occidental sang notice sa mga watchers kag politiko nga interesado nga ipanagtag sang mga ini ang balota sa Mayo 6 sa mga local COMELEC sang tagsa ka LGU.
Patigayunon ang testing kag sealing sang mga Automated Counting Machines sa Miyerkules, Mayo 7.
Nagpasalig si Ananoria nga preparado na ang COMELEC Negros Occidental para sa pagpatigayon sang May 12 midterm elections.
