Nagahingyo ang isa ka anay overseas Filipino workers nga mabuligan nga mapadali ang ginpromisa sa ila nga assistance nagikan sa Overseas Workers Welfare Administration (OWWA) sang nagligad nga tuig.
Sang Martes, nagpadulong sa estasyon sang Bombo Radyo si Alyas Anna, residente sang Murcia, Negros Occidental kag nagpauli sa Pilipinas sang 2020 agud ipadangat ang reklamo nahanungod sa promisa sa ila sang OWWA nga P20,000 nga cash assistance halin sa Balik Pinas Hanapbuhay Program.
Suno sa iya, indi magnubo sa 30 ka mga OFWs diri sa probinsya nga nagpauli sa Pilipinas ang ginpromisahan sang OWWA kag ginpaproseso sang requirements.
Marso 2020 ang ginpahayag nga release date apang suno diri, naabtan na 2021 kag wala pa nila ini gihapon mabaton.
Suno kay Alyas Anna, makapila ka beses na sila nga ginapabalik-balik sang ahensya kag ginahambalan lang nga yara na sa Iloilo ang kwarta kag mahulat lang sila sang text ukon tawag apang wala man sang may nagacontact sa ila.Nagalaom ini nga sila ang mabuligan bangud wala man sila sa karun sang pangabuhian kag pigado gid ang ila sitwasyon.
