Yara na sa estable nga kondisyon ang 11 anyos nga bata nga babayi nga matapos makaangkon sang madamo nga samad bangud sa gin-alegar nga ginkastigo sang iya mismo nga iloy kag duha ka tiyo kag tiya sa ciudad sang Talisay.
Sa interview sang Bombo Radyo Bacolod kay Dr. Vicente “Itik” Iturriaga sang Teresita Lopez Jalandoni Provincial Hospital, ang bata may gisi sa baba, may bukol sa ulo, nagabanog ang kamot, may black eye, kag madamo sang kinagtan sang ido.
Suno diri, ginsaysay sang bata nga ginsugo siya sang iya iloy nga magsag-ob sang tubig apang wala na sini masarangan nga mabuta ang ginapasag-uban sa iya gani ginkastigo nila ini.
Samtang, ginakastigo ang bata, may yara sang pitbull nga nakahigot nga naglab-ot kag nagkagat sa bata.
Gintago pa ini sa isa ka ginapahayag nga septic tank apang nakatigayon ini nga maka gwa kag makapangayo sang bulig.
Ginpahog pa ang bata nga kun ini ang manugid siya ang sunogon.
Gindala sa Teresita Lopez Jalandoni Provincial Hospital sang nagbulig diri nga katapo sang Department of Social Welfare and Development (DSWD) sa ciudad sang Talisay.
Isa naman sa gina-alegar nga rason kun ngaa tuman ang kaakig sang iloy sa bata sa gina-alegar nga ang bata ang bunga sang unwanted pregnancy bangod nga ginhimuslan ang iloy.
Sa karun, yara na sa estable nga kondisyon ang bata kag suno kay Iturriaga, nakit-an sa bata nga nalipay ini sang siya ang ginpasalig nga buligan sang gobyerno bangod nga indi na sini luyag nga magbalik pa sa iya pamilya.
