Tanan nga mga eskwelahan sa bug-os nga Western Visayas ang magabukas sang klase bwas, Hulyo 29 bangud wala man sang nahalitan sang Bagyo Carina nga ginpabaskog pa sang Hanging Habagat.
Sa interview sang Bombo Radyo Bacolod kay Hernani Escullar, Jr., spokesperson sang Department of Education Region 6, 100 porsyento na nga handa ang mga eskwelahan sa idalom sang 21 ka division ukon 4, 057 public schools sa bilog nga rehiyon.
As of July 24, nagadangat sa 1, 284, 918 ang numero sang mga enrollees apang nadugangan na ini tubtub sang Biyernes nga amo ang ulihi nga adlaw sang enrollment.
Makit-an naman ang actual enrollment sa masunod nga sinemana kun matapos na ang encoding sa Learner Information System.
Sang tinalikdan nga school year, malapit 2 million ang enrolees sa bilog nga school year apang indi pa madeterminar sa karon kun nagsaka ukon nagnubo ang enrollment.
Suno kay Escullar, sarang gihapon makapaenroll bisan nagsugod na ang klase ilabi na kun may mga factors ngaa naulihi ini sa pagpaenroll, bangud hatagan man ini sang kahigayunan agud nga makalagas sa wala niya natambungan nga klase.
Apang nagakampanya ang DepEd suno kay Escullar nga indi na paghulaton nga madugay na nakasugod ang klase antes ipaenroll ang bata.
Ginapahanugutan naman ang pagtransfer sang bata sang eskwelahan basta macomply ang mga requirements kag indi man tama ka budlay ang proseso para diri, magluwas lang kun transfer nagikan sa private school padulong sa public school nga may arrears pa ini sa ginhalinan.
