Ginakabig sang operator sang MBMJ and Uy Services nga unfair ang pagpahanugot sa mga traditional jeepneys nga magbiyahe apisar nga wala sang permit samtang sila ang naggasto gid agud makacomply sang requirements sa modernized jeepneys.
Sa interview sang Bombo Radyo kay Mary Jane Uy, ginapangita sini ang hustisya sa padayon nga extension sang moratorium sang mga traditional jeepneys kag nagalaom nga mangin patas kuntani bangud sila ang nagcomply sa modernization kag gingastuhan ang pagkuha sang Mayor’s Permit apisar nga manugyear-end na.
Suno diri, unfair para sa iya bangud pwede man lang gale nga indi maggawad sang permit gani kuntani wala nalang sila naggawad.
Suno sa iya, masakit sa iya nga bahin bangud makapila ka beses na ang extension nga ginhatag sa pagbiyahe sang mga traditional jeepneys kag nagapamangkot ini kun tubtob san-o pa ang extension.
Suno pa diri, sila ang ginakadlawan lamang kag ginasuyaan apisar nga sila ang nagtuman sa layi kag nagcomply sa mga requirements.
Aminado man ini nga sila ang nagastruggle bangud wala pa sila nakabawi sa ila gasto kun sa diin ang ila income ang husto lamang ihatag sa bangko kag ipasweldo sa mga drivers kag mga konduktor.
Suno kay Uy, kuntani sundon sang mga yara sa posisyon ang layi bangud sila man ang naghimo sini.
