Magahatag sang bulig pinansyal, livelihood assistance kag psychosocial support ang Overseas Workers Welfare Administration (OWWA) sa pamilya sang Bornales Siblings.
Nahibaluan nga napauli na sa ila puluy-an sa Hacienda Badiang, Barangay E. Lopez, Silay City ang bangkay sang siyam ka tuig nga bata nga si Desiree Bornales kahapon sang hapon, nga gilayon man nga ginpadulongan sang OWWA agud maghatag sang bulig kag pakig-unong sa pamilya.
Natalana nga ilubong ang biktima sa Domingo sa Silay City Public Cemetery.
Sa interview sang Bombo Radyo kay OWWA Administrator Atty. Patricia Yvonne Caunan, ang iloy sang mga bikitma nga si Ronelyn Montañez Ansiano ang isa man ka aktibo nga miyembro sang ila ahensya, bilang isa ka overseas Filipino worker (OFW).
Pasalig sini nga padayunon nila ang paghatag sang bulig sa pamilya sini.
Suno kay Caunan, personal nila nga gindul-ong ang bulig sa iloy sang mga biktima nga nagbantay sa duha pa sini ka mga kabataan nga nagapaayo sa Corazon Locsin Montelibano Memorial Regional Hospital
Mensahe sini sa pamilya Bornales nga kaupod sila sa kasubo nga nabatyagan sang pamilya.
