P1.7 million nga balor sang illegal nga druga ang nakumpiskar sa tatlo ka mga persona sa Purok Barracuda, Barangay 1, Bacolod City, Huwebes sang gab-i.
Ang mga subject person amu sanday Mark John Melocoton, 21-anyos, residente sang Purok Kagaykay, Brgy. 2, Bacolod City; Reniel Oro, 22-anyos, residente sang Purok Bayanihan, Brgy. Banago, Bacolod City; kag Dave Rivera, 23-anyos, residente sang Purok Medaine, Brgy. Bata, Bacolod City.
Sa interview sang Bombo Radyo kay Police Major Eugene Tolentino, station commander sang Bacolod Police Station 2, nakuha sa tatlo ka mga persona ang kapin 250 grams sang suspected shabu.
Suno kay Tolentino, kilalahay ang tatlo ka mga subject person kag madugay na nga ginamonitor sang kapulisan.
Ginalantaw man nga posible isa lang ang ginakuhaan nila sang supply ni Anthony Cuadra, nga nakuhaan man sang P1.5 million nga shabu kag granada sa checkpoint sa Purok Sigay, Barangay 2, Bacolod City sang Miyerkules.
Suno diri, sa luwas sang probinsya ginakuha ang supply kag posible sa Cebu ini nagikan.
Wala naman nila ginkakibot ang pagkakumpiskar sang minilyon nga balor sang shabu sa karun nga paniempo kag sa mga festival sites bangud in demand subong nga Masskara Festival ang illegal nga druga.
