P3.4 million nga balor sang illegal nga druga ang narekober sa isa ka 37-anyos nga lalaki sa drug buybust operation nga ginpatigayon sang Bacolod Police Station 8 kag City Drug Enforcement Unit sa Purok Hollowblocks, Barangay Singcang-Airport, Bacolod City alas 9:32 subong nga gab-i.
Ang subject person amu si Kenn Tecson alas Biboy, wala sang trabaho kag residente sang Paho Street Capitol Heights, Barangay Villamonte, Bacolod City.
Nakuha sa iya paghinakop ang apat ka small knot tied transparent plastic sachet sang suspected shabu; apat ka big knot tied transparent plastic sachet sang suspected shabu; isa ka belt bag nga nagaduag itom; isa ka keypad cellphone, P1,000 bill kag P30,000 nga boodle money.
Ang narekober nga illegal nga druga ang ginabanta nagabug-at sang 500 grams.
Sa interview sang Bombo Radyo kay Bacolod City Police Office Director Police Colonel Joeresty Coronica, nagapati ini nga posible pagagamiton para sa Masskara Festival ang nakumpiskar nga illegal nga druga bangud mataas sa karun ang demand sang shabu.
Suno sa iya, kapin duha ka bulan nila nga ginmonitor si Tecson nga isa ka bodegero kag ini ang nag-ako nga ang nagasugo sa iya ang nakahunong sa karun sa Bureau of Jail Management and Penology – Bago City apang subject pa ini for verification.
Sa karun ang suspetsado ang nakahunong sa Bacolod Police Station 8 kag magapangatubang sang kaso nga paglapas sa R.A. 9165 ukon Comprehensive Dangerous Drugs Act of 2002.
