Nagdangat sa masobra sa P72 million nga balor sang ilegal nga druga ang nakumpisar sang Police Regional Office 6 sa bulan sang Agosto.
Sa 236 ka police operations nga ginpatigayon, naaresto ang 307 ka mga suspetsado kun sa diin 10,707 grams sang suspected shabu nga nagabalor sang P72.8 million ang nakumpiskar kag 14 grams naman sang marijuana ang nakumpiskar nga nagabalor sang P1,680.
Natigayon nga naaresto sang Negros Occidental Police Provincial Office ang 115 ka mga suspetsado, Iloilo City Police Office nga may 54 nga naaresto, Bacolod City Police Office nga may 46, Iloilo Police Provincial Office nga may 42, Capiz Police Provincial Office nga may 12, Regional Police Drug Enforcement Unit 6 (RPDEU6) nga may 11 kag Antique, Aklan kag Guimaras Police Provincial Offices nga may tag-siyam ka naaresto kada isa.
Sa intervirew sang Bombo Radyo kay PRO 6 Spokesperson Police Lt. Col. Arnel Solis, ang ini nga accomplishment sang PRO6 ang nagapakita lamang nga nagakabuhinan na ang numero sang naga-engage sa illegal nga druga kag ini ang magaserbe nga warning sa mga involved pa sa illegal drugs.
Suno diri, wala naga-untat ang kapulisan sa pagpasanyog sang kampanya batok sa illegal nga druga kag illegal activities.
