Ginakasubo sang mga mangunguma sa Negros Occidental ang P8 kada kilo nga farm gate price sang humay.
Sa interview sang Bombo Radyo Bacolod kay Pedro Limpangog, Presidente sang Federation of Irrigators Association in Central Negros (FIACN), ginkakibot sini nga may yara sang P8 kada kilo nga presyo sang humay.
Suno kay Limpangog, nagmeeting sila kahapon sa mga miyembro sang federation kag nakakuha ini sang impormasyon nga P12 kada kilo lamang ang farm gate price sa probinsya, apang nakibot ini nga sa Northern Luzon kag iban pa nga bahin sang pungsod, P8 na lamang ang kada kilo.
Suno kay Limpangog, ang capital sang manunguman ang yara sa P12 tubtob P14 sa pagtanum sang humay, gani kuntani mas sobra pa diri ang farm gate price kun baklon ang ang ila ani agud nga indi magutman ang ila pamilya.
Suno diri, ang tuman ka barato nga pagbakal sang humay ang indi na husto kag makaluluoy na ang mga mangunguma.
Dugang pa sini nga dapat lantawon sang gobyerno kun ano ang ila mahimo agud mabuligan ang mga makaluluoy nga mangunguma.
Samtang ginalantaw sang Provincial Agriculturist sang Negros Occidental nga manubo ang farm gate price sang humay sa karun bangud peak season sang harvest.
Sa interview sang Bombo Radyo Bacolod kay Dr Dina Gensola, ang humay antes ibaligya ang dapat may yara sang manubo nga moisture content.
Suno kay Gensola ang National Food Authority ang nagabakal sang humay nga may 14 percent moisture content sa balor nga P19 tubtob P23 kada kilo.
Suno diri, kun ang ginabaligya ang preska nga humay ini ang baklon sa manubo nga presyo.
Samtang nagahambal naman ang mga mangunguma nga sila ang namierdihan bangud mas mataas pa ang capital sa pagpanguma kun ipaanggid sa presyo sang ila patubas.
Nadugangan pa ang pamiyerdihan sang mga ini sang nagsulod ang mga bagyo.
Suno diri luyag man nila tani sa Department of Agriculture nga i-control ang pagbaklanay sang mga humay sa bulig sang marketing side ukon paagi sa NFA apang may-ara sang requirements.
Suno diri kun mataas ang moisture content sang humay mahimo ini nga ireject sang NFA kag kun may magbakal man tuman na kanubo ang presyo bangud ini ang basa.
