BACOLOD CITY — Indi magpasugot si Abang-Lingkod Partylist Representative Stephen Paduano nga iga-appoint lamang ang mga opisyal sang barangay kun iga-postpone ang Barangay kag Sangguniang Kabataan elections nga natalana na kuntani sa bulan sang Oktubre.
Sa interview sang Bombo Radyo, ginpahayag ni Paduano nga talakayon na sang Kamara ang hagna nga nagaduso sang postponement sang eleksyon binaranggay sa pagbalik sang ila nga session sa Hulyo 24 nga amo man ang adlaw sang State of the Nation Address ni Presidente Rodrigo Duterte.
Nahibaluan nga natalana na kuntani sa Oktubre 23 ang eleksyon.
Apang suno kay Paduano, kun i-appoint naman lang sang presidente ang mga opisyal sang barangay, mas maayo pa nga dayunon nalang ang eleksyon.
Panindugan sini, magaginamo kag maga-antos ang mga barangay kun sala ang tawo nga iga-appoint kag indi maka-function sang husto.
Suno diri, sarang man nga hatagan sang hold-over capacity ang mga incumbent officials kun indi pagdayunon ang eleksyon.
Kun imbolbado man sa iligal nga druga ang isa ka opisyal suno sa kongresista, pasakaan nalang ini sang kaso sa korte.
