Nadelay ang pag-abot sang Indiana Pacers sa Oklahoma City bangud sa malain nga panahon.
Ang hampang sang mga ini ang historical bangud 25 ka tuig ang ginhulat antes liwat nga makabalik ang team sa NBA Finals.
Samtang nga yara sa kahawaan ang eroplano sang Pacers, naghatag sang alerto ang mga experts angot sa magaabot nga buhawi, mabaskog nga ulan kag pagbaha sa Oklahoma City kag mga malapit nga lugar.
Isa ka buhawi man ang nakita sa Norman, Oklahoma nga yara sa kapin 20 miles gikan sa Oklahoma City apang wala man gilayon natumod kun nagtupa ini ukon nagtuga sang kahalitan.
Bangud sa malain nga tiyempo, nagreroute ang flight sang Pacers padulong sa Tulsa, Oklahoma kun sa diin sila ang nagrefuel antes magbalik sa ila nga destinasyon.
Ang Finals media day amo ang natalana sa Paycom Center samtang maga-atubangay ang Indiana Pacers kag Oklahoma City Thunder sa Game 1 sang serye sa Biyernes, oras sa Pilipinas.
