Indi man kinahanglanon kag overpriced para kay former Philippine National Police (PNP) Chief General Nicolas Torre III ang unsolicited proposal nga magbakal sang 80,000 firearms para sa PNP sa balor nga P8 billion.
Madumduman nga ginapahayag nga ginkakas ni Presidente Ferdinand Marcos Jr. si Torre bilang PNP Chief bangud sang indi sini pagsunod sa ginaalegar mando ni Interior Sec. Jonvic Remulla nga magbakal sang nasambit nga armas.
Sa isa ka interview, ginpahayag ni Torre nga yara sa lamisa niya ang amo nga papel antes sia nga gin-relieve sa pwesto apang wala niya ini ginpirmahan bangud nga may luyag pa ini nga bag-uhon diri kag indi niya makita nga kinahanglanon ang amo ka dako nga pondo kag ang mismo nga pagbakal sang natumod nga mga high powered firearms.
Dugang pa niya, nga may iban pa nga mga rason kun ngaa nagapamalabag ini sa amo nga proposal apang wala na niya ini gindetalye pa.
Suno kay Torre, nga ginbilin niya lang sa iya lamesa ang nasambit nga dokumento kag wala ini nakahibalo kun paano ini naggwa sa social media.
Wala man sang ideya si Torre kun nadayon ang pagbakal sang natumod nga mga armas.
Paathag pa sang anay PNP Chief, nga sa karon 135 percent ang fill up sang shorthand guns sa kapulisan kag mas madamo ini kumparar sa numero sang mga pulis.
Samtang, wala nagapati si Torre nga kinahanglan sang tuman ka damo nga long firearms.
