Indi kumbinsido ang Kongresista sa 5th District sang Negros Occidental sa mga rasun sang Bureau of Soil and Water Management sang Department of Agriculture, nga nagapanindugan nga indi sarang makapatigayon sang cloud seeding sa probinsya.
Sa interview sang Bombo Radyo Bacolod kay Negros Occidental 5th District Representative Atty. Dino Yulo, sa latest nga pahayag sang mga opisyales, panindugan sang mga ini nga wala sang seedable clouds nga makita sa Negros Occidental.
Apang pahayag sang kongresista, indi matuod nga wala sang seedable rain clouds bangod may mga tinion man nga may makita nga maitom nga panganod, kay may mga nagatupa man nga talithi sa bilog nga semana.
Dugang pa ni Yulo nga may mga nagapadala man sa iya sang litrato sang madamol nga panganod sa Southern Negros Occidental.
Bangod sini, sa panulok sang kongresista, kulang sa effort kag wala sang pag-ulikid ang mga opisyales sang Bureau of Soil and Water Management.
Nainit man ini sang mabatian ang pahayag sang mga opisyales sa ila nga meeting sang tinalikdan nga “batunon na lamang” ang sitwasyon.
Nagapati ini nga sa akto sang mga opisyal, makita nga ang mga ini ang indi preparado, gani ginahangkat sini nga ipagwa ang benefit risk study sang bureau.
Pahanumdom sang kongresista nga kaangay lamang nga nagabalatian ang bata, kag hambalan lamang ang amay nga batunon na lang ang sitwasyon sang bata.
Panindugan ni Yulo nga dapat makita man sa kaangay nga mga opisina sang gobyerno ang pagkabalaka sa mga apektado nga mga pumuluyo.
Suno diri, ang problema ang indi na lamang bangod sa kakulang sang tubig, bangod sa ulihi ini ang magatuga na sang social unrest.
Pahayag ni Yulo nga apat ka bulan na nga indi makatrabaho sa kampo ang mga mangunguma gani sila ang nagakagutman na, kag indi man sila mahimo mahambalan nga sa Hunyo na lamang magkaon.
Ginakasubo sang kongresista nga ang Bureau of Soil and Water Management personnel ang kaangay nga bulag kun magtulok sa kahawaan, ukon mahimo nga sila ang nagapabulag-bulag lamang.
