Ginpatpat sang bise presidente ang mga rason sang pagpadulong sini sa ciudad sang Bacolod.
Sa press conference sa Office of the Vice President – Bacolod City Satellite Office, ginpahayag ni Vice President Sara Duterte nga nagapanguna nga rason sa pagpadulong sa Bacolod City amo agud suportahan ang mga medical doctors nagikan sa Davao City.
Ang mga ini ang nagpatigayon sang medical mission sa ciudad para sa mga bata nga may harelip kasubong man ang may mga cleft palate.
Suno sa bise presidente ginpadulungan nila ang mga medical doctors sa Bacolod Adventist Medical Center bangud may ara ini sang personal nga relasyon sa isa sa mga pasyente.
Suno kay Duterte una sini nakita ang bata sang nagakampanya sadtong 2022 kun sa diin samtang nagamotorcade, dala sang iloy ang bata nga may harelip.
Suno diri, ginkuha niya ang detalye sang bata agud mabuligan.
Ang bata ang ginrefer sang doctor sa Davao City sa isa ka plastic surgeon diri sa ciudad sang Bacolod.
Natigayon naman nga maoperahan ang bata kag nasirado ang pallete.
Naghatag man ini sang dugang nga kapital sa mga magagmay nga negosyante sa ciudad kag naghatag man sang cash assistance sa asosasyon sang mushroom growers.
Nagmeeting man ang mga ini sa paghatag sang bulig nga food and non-food items kasubong man medical sa mga apektado sa tion nga maglupok ang Bulkan Kanlaon.
