Ginakabig sang General Alliance of Workers Association (GAWA) nga welcome development ang pagbukas sang Boracay sa mga turista nagikan sa nagkalain-lain nga bahin sang pungsod sumugod sa Oktubre 1.
Nahibaluan nga una na ginbuksan sa mga turista nagikan sa Western Visayas ang tourism hotspot bilang tikang agud makabangon ang ekonomiya sa lugar.
Suno sa Department of Tourism, kun magapadulong sa isla, kinahanglan nga negatibo ang resulta sang swab test 48 tubtob 72 oras antes magkadto.
Dugang pa sang departamento nga sa paluparan lang sang Caticlan pwede mag-agi.
Nahibaluan nga ang lokal nga pamunuan sang Malay ang nag-apelar sa national government nga pahanugutan na ang mas malapad nga pagbukas sang turismo sa isla.
Sa interview sang Bombo Radyo kay GAWA Secretary General Wennie Sancho, maayo ini nga development kag tikang agud makasugod liwat ang ekonomiya nga tuman nga naapektuhan bangud sa COVID-19 pandemic.
Suno kay Sancho, indi lng mga turista ang makabenepisyo diri kundi subong man ang mga residente sang Boracay nga mga nagasalig sang ila palangabuhian sa isla ukon ginakabig nga informal workers.
Aminado man ini nga mabudlay ang magbalanse sang kabuhi kag palangabuhian gani apisar nga amat-amat nga mabuksan ang turismo, kinahanglan nga maghalong gid kag ipatuman ang health protocols.
Pabor man ini sa protocol nga kinahanglan ipaidalum anay sa swab test ang mga turista antes makasulod sa isla.
Suno kay Sancho, linibo ka mga mamumugon nagikan sa Bacolod, Iloilo, Aklan kag Antique ang nagasandig sang ila pangabuhian sa pagbukas sang Boracay gani nagalaom ini nga magpadayon na ang pagbangon sang turismo kag makabalik na ang ekonomiya sa Western Visayas.
