Gintawag nga ‘impractical’ sang secretary-general sang Sentrong Samahan ng mga Tsuper at Operators sa Negros (SSTONE) ang pagkonsiderar sang Land Transportation Office (LTO) sang pagbutang sang child car seat sa mga public utility vehicles (PUVs) kag jeepneys para sa safety sang mga kabataan samtang nagasakay.
Nahibaluan nga sa idalom sang new car seat law, ang mga bata nga nagaedad sang 12 panubo ang indi pagpahanugutan nga magsakay sa front seat kag dapat may naka-install nga child car seat para sa mga ini.
Ang implementasyon sini kuntani ang nagsugod na sadtong Pebrero 2 apang ginpaiway ini sang LTO kag Department of Transportation bangud magapatigayon pa sila sang pagtuon sa sulod sang tatlo tubtob anom ka bulan antes ini hugot nga ipatuman.
Samtang, ginpahayag naman sang damlag lang ni Atty. Roberto Valera, LTO deputy director for law enforcement, nga ila ginakonsiderar ang child car seat sa mga PUVs.
Sa interview sang Bombo Radyo Bacolod kay SSTONE secretary-general Jessie Ortega, ginpahayag sini nga ka-impraktikal sang plano sang LTO bangud nga lain ang build sang PUVs kun ikumparar sa mga pribado nga salakyan.
Dugang pa sini nga daw kaangay nga desperado kaayo ang gobyerno kun sa diin tanan nalang nga makwartahan sang mga ahensya ang ila ginapatuman.
Suno kay Ortega, makaluluoy ang mga pumuluyo subong man ang mga driver kag operators.
Posible naman suno sa iya nga magpatigayon sila sang hublag-protesta kun madayon ang amo nga plano.
