Ginpahayag sang Chief Executive Officer sang Metro Bacolod Chamber of Commerce and Industry (MBCCI) nga para sa business sector indi solusyon ang pagdula sang systems loss charges nga isa sa mga ginabayaran sang kunsomidor sa ila nga electric bill.
Sa interview sang Bombo Radyo Bacolod kay Frank Carbon, dapat nga estoryahan kag himuan sang solusyon sang gobyerno amo ang kakulang sang supply sang kuryente sa Visayas.
Suno kay Carbon ang nagakaeksperyensyahan sang Visayas nga yellow kag red alert ang magadugay pa sang duha ka tuig.
Suno diri ang nasambit nga alerts ang nagakahulugan nga kulang ang supply sang kuryente kag ang ginahimo amo ang rotational brownouts.
Suno sa MBCCI CEO madamo sang makuhaan sang kuryente sa Isla sang Negros bangud may yara sang solar kag biomass apang sa adlaw lamang ini magamit bangud sa gab-i indi na.
Suno kay Carbon dapat may yara sang battery para sa storage sang solar kag biomass energy agud nga magamit ini kun gab-i kag masolusyunan ang kakulang sang kuryente.
Suno pa diri ang geothermal energy sa Valencia, Negros Oriental ang ginadala pa sa Cebu kag Luzon nga dapat ini ang i-supply na sa Negros.
Suno kay Carbon, kun masolusyunan ang kakulang sang supply sang kuryente magadamo ang negosyo kag magadamo man ang trabaho.
