Aminado ang political analyst nga ikalupog sang mga Duterte sa 2025 Election ang paghunong kay Pastor Apollo Quiboloy.
Sa interview sang Bombo Radyo Bacolod kay Atty Jomax Ortiz, dako ang epekto sang pagkaaresto kay Quiboloy bangod nadula na ang pinakadako nga financial supporter sang mga Duterte.
Nagapati ang abogado nga gamiton man ang issue sa kampanya agud ipaandam sang kampo ni President Ferdinand ‘Bongbong’ Marcos Jr. nga kun magdaog si Vice President Sara Duterte sa 2028 Presidential Elections, dako ang posibilidad nga ipardon sini sa mga kaso si Quiboloy.
Sa pagkadula ni Quiboloy, pahayag ni Ortiz nga mahimo nga sa China na lamang magpalapit ang mga Duterte sa 2028.
Apang ginakahangawa sini nga ang tikang ang magakinahanglan sang dako nga kabaylo ukon pabor.
Magluwas diri ginalantaw man nga tinguhaan sang administrasyon nga wala sang Duterte nga makadaog bilang alkalde sa 2025 midterm elections.
Suno kay Ortiz, mabuhinan man ang supporters sang Duterte bangod ini ang mangin katumbas sang pagkontra sa gobyerno.
Paathag sini nga kun gamitan sang resources sang gobyerno, mabutang man sa alang-alang ang mga supporters sang Duterte bangod sila ang mahimo indi mahatagan sang dako nga budget.
Dugang pa ni Ortiz nga manubo man ang tyansa nga magpapili pa bilang alkalde si former President Rodrigo Duterte, sa panindugan nga nagadeteriorate na ang mentality sini kaangay sa sitwasyon ni US President Joe Biden.
Sa baylo, ang pinaka-mahimo nga magpapili sa pagka-alkalde amo sanday Davao City Mayor Sebastian “Baste” Duterte ukon Davao City First District Congressman Paolo “Pulong” Duterte.
Apang aminado ang political analyst nga mabug-at para sa duha ka Duterte ang pagbunggo sa gobyerno.
Magluwas diri, ginpahanumdom man sang abogado nga nagnubo ang trust ratings ni VP Sara sang napulo tubtob kinse porsyento matapos ang pagbiya sa gabinete; nga nagpanaog pagid sa ginpakita sini nga pagsabat sa budget hearing.
