Kalmado na ang sitwasyon sa Port-au-Prince, ang capital sang Haiti kasunod sang nagluntad nga gang war.
Sa interview sang Bombo Radyo Bacolod kay Bombo International News Correspondent Fr. Adrian Louie Zambo Atonducan, naghagan-hagan na ang kinagamo humalin sang nag-anunsyar sang resignation si Haitian Prime Minister Ariel Henry sang Marso 12.
Pahayag sini nga si Henry ang nagbulos sa pwesto matapos gin-assassinate si Hatian President Jovenel Moise sang Hulyo 2021.
Suno kay Atonducan, late 2000s sang gindisolve ni Moise sadto ang military forces kay may-ara lamang sang ginapadala nga United Nation Peace Keeping Forces nga nagamintenar sang kalinong sa pungsod, apang sang ang mga ini ang nagbiya sang 2016 tubtob 2017, amat-amat naman nga nagbalik ang mga gang.
Aminado si Atonducan nga kaangay nga lain ang agenda ni Henry, bangod ginpabay-an sini ang mga gangs tubtob nga naglala na ang kinagamo.
Antes magbalik sa pungsod ang Prime Minister, una na nga ginransack sang mga gangs ang mga establishimento kaangay sang supermarkets kasubong man ang airports, gani naparalyze ang local kag international flights samtang sa karun ukopado naman sang mga ini ang seaports.
Aminado si Atonducan nga may-ara gihapon sang pila ka mga kinagamo nga nagaluntad sa dalanon, kag wala sang ginapili ang mga gang, local man ukon foreign nationals.
Suno diri, sa masami sila ang nagabutang sang barikada sa mga dalanon, ginapangsunog kag ginaguba ang makit-an nga mga salakyan.
Iban sa mga residente ang nagbiya na lamang sa ila mga puluy-an kag nagtinir nalang sa mga tents ukon auditorium agud makalikaw sa kinagamo.
Sa pihak nga bahin, bangod indi naman restricted ang paggamit sang social media, mahapos man nila macontact ang iban nga mga Pilipino.
Suno diri, 147 ang kabug-usan nga numero sang Pilipino sa Haiti kag kadam-an sa mga ini ang nagatrabaho sa managerial ukon supervisory positions.
Ginalauman sini nga sa tukuron nga transitional presidential council, magakooperar na ang mga gangs kag untaton ang pagpanggamo.
Pangamuyo na lamang ang ginasaligan sang mga ini agud mabalik ang kalinong sa Haiti.
Panawagan naman ni Atonducan sa gobyerno sang Pilipinas, nga magpatigayon sang repatriation program para sa mga Pilipino nga luyag na nga magbalik sa pungsod.
