Gin-athag sang deputy for medical sang Bacolod City Emergency Operation Center (EOC) nga wala sang problema ang pagpabakuna sa buttocks ukon sa buli.
Suno kay Dr. Chris Sorongon, entramuscular ang ruta sang vaccination, kag ang buttocks ang makabig man nga vaccination route gani wala sang problema sa pagpatublok diri.
Apang pahanumdom ni Sorongon nga mas maayo kun himuon lang ini sa pribado nga vaccination center kaangay sang private clinic, agud may ara sang privacy.
Pahanumdom sang doktor nga kun sa mga mass vaccination kaangay sa mall ang patigayunan sang pagpabakuna, mas maayo nga pilion nalang ang pagpatublok sa abaga.
Dugang pa sini nga madamo sang nagalinya sa vaccination centers gani mangin inconvenient ini sa iban kun magahalin pa sa pwesto kag magapangita sang pribado nga lugar agud lang mapatigayon sa buli ang pagbakuna.
Paathag pa ni Sorongon nga bangod open vaccination ang pagbakuna sa mall, makatuga naman sang eskandalo kun sa buttocks magapatublok ang mga pumuluyo.
Samtang, ginpakigbahin naman ni Sorongon nga masobra sa tunga sang mga nagpositibo sa ciudad ang mga close contacts sang mga nauna nga nagpositibo.
Kalakip man sa nagadugang nga kaso ang mga nagabusong bangod required ang mga ini nga magpadalum sa swab test makaligad sang 37 ukon 38 ka semana.
Dugang pa sini nga ginaswab man ang mga dialysis patient kag ang mga Locally Stranded Individual (LSI) nga naglapse na ang RT-PCR test result sa 72 hours pagdangat sa ciudad sang Bacolod.
Aminado man si Sorongon nga may mga tinion nga madamo ang nagakarecord nga positibo sa virus nga kun kaisa gikan sa mga pribado nga laboratoryo.
Pasalig naman sini nga ang mga nagpositibo nga close contacts ang na extract na kag nakaquarantine antes paman maggwa ang resulta gani makasalig nga gamay lang ukon wala ang mga ini sang nalatnan.
