Nag-appeal si Bacolod City Councilor Celia Flor, chairperson sang Committee on Markets sa Sangguniang Panlungsod sa Bacolod Yuhum Foundation nga mapanubo ang renta ukon mahatagan sang discount ang mga kiosk owners sa Bacolod Public Plaza.
Sa interview sang Bombo Radyo Bacolod sa konsehal, may pila ka mga stall owners ang nagpalapit sa iya kag naghingyo nga mabuligan bangod sila ang wala sang maganar sa ila nga pwesto.
Aminado man si Flor nga siya mismo ang nakakita sa makaluluoy nga sitwasyon sang stall owners bangod sa madutay nga festival goers sa Bacolod Public Plaza tuga sa tayuyon nga mga pag-inulan.
Nagsugod ang 104 ka mga kiosk sa pagbaligya humalin sang Oktubre 11, apang magluwas sa ulan, nagnubo man ang festival goers sa area bangod mas nafocus ang mga aktibidad sa Bacolod City Government Center.
Suno kay Flor yara sa P17,000 tubtob P25,000 ang renta sa kada kiosks, kag ang ila tagsa ka pwesto ang mas dako sangsa tinalikdan nga tuig.
Si Flor kaupod ang iban nga konsehal ang nagahingyo sa Bacolod Yuhum Foundation nga mapanuboan sa P12,000 tubtob P15,000 ang renta ukon bisan mahatagan lamang ang mga ini sang discount.
Aminado ang konsehal nga mahimo mamiyerdihan ang Bacolod Yuhum Foundation, apang ini ang mas maayo na lamang sangsa ang magagmay nga mga negosyante ang mag-antos.
