Ginakwestyon sang convenor sang Power Watch Negros ang pagpasaka sang sukot sa kuryente apisar nga ini ang kapaltahan sang mga power generation plant.
Santo sa advisory sang Central Negros Electric Cooperative (CENECO) magapatuman sang pagsaka sa residential rate nga P3.2066/kwh gani magadangat na sa P15.1632 ang bayran sang mga kunsumidor per kilowatt/hour bangod sa pagtaas sang generation costs.
Sa interview sang Bombo Radyo Bacolod kay Wennie Sancho, halos kada tuig nalang nga naga-issue sang orange, yellow kag red alert ang National Grid Corporation of the Philippines (NGCP) bangod sa ginakulang nga power supply partikular na kun summer.
Ini ang bangod naman sa kapaltahan sang generation plants nga nagapatigayon sang planned kag unplanned outages.
Bangod sa manubo nga power supply gikan sa coal fired powerplant, nagakapilitan ang mga ini sa pagbakal sa diesel plant nga mas mahal kasubong man nagmahal man ang 3-day wholesale electricity spot market (WESM).
Ginakatingala ni Sancho kun ngaa wala sang may nagakutot sa generating plants sa baylo ang pagtaas sa generation costs ang ginapapas-an sa konsumedor.
Ginalantaw sini nga kaangay nga may konsabuhay nga nagakatabo bangod sa makatilingala nga dulungan nga outages sang mga generation plant.
Suno kay Sancho, may ara nga natalana nga limit sa numero sang outages nga sarang mapatuman sang mga planta, apang ini ang kaangay nga wala man gina-implementar sang Department of Energy (DOE) kag Energy Regulatory Commission (ERC).
Bangod sini ang konsumedor nga naga-antos na sa pagmahal sang tanan nga balaklon, ang nagakadugangan ang penetinsya sa mas mahal nga electric bill.
